藏佇水底的愛: 王崇憲的台語文．台語詩 | 誠品線上

藏佇水底的愛: 王崇憲的台語文．台語詩

內容簡介

內容簡介

作者介紹

作者介紹 王崇憲 高雄出世的下港囡仔，一直到讀大學，才有通好去臺北蹛，共下港囡仔的臺灣國語，當做是北部同學攏無的𪁎趒代，嘛無想欲改。 師大畢業了後，本成想欲好好仔教團文，煞受著母語復興運動啟發，轉途教台語，閣拚勢參加台語比賽，參與台語寫作，練家己的工夫。 台語若有才調書寫天跤下的各種代誌，台語就有法度生湠、傳承，毋才我會各種文體攏想欲寫看覓咧：寫散文、寫小說、現代詩、科普文章，嘛寫佇身軀邊的……愛。

產品目錄

產品目錄 序│咱做伙行這段本土語文路／蔡清華 .................. 2人間有愛，咱用台語共寫落來／王崇憲 ............ 6卷一│散文藏佇水底的愛 .............................................. 18悾闇囡仔的記持 ........................................... 31母語教學．馬拉松 ........................................ 34北國雪聲 ..................................................... 47阿母的臭汗酸味 ........................................... 49舊年的聖誕節 .............................................. 52聲音七十二變 .............................................. 55冠軍老爸 ..................................................... 61低路師的DIY ................................................ 65咖啡叫醒我的靈魂，運動滋養我的肉體 ........... 75卷二│科普文章一秒鐘有偌久？時間是按怎決定的？ .............. 82清氣能源—氫氣發電 ................................. 842現代物理學之父—愛因斯坦 ........................ 86烏洞—宇宙內底上烏暗的存在..................... 89宇宙時光機—Webb 太空望遠鏡 ................... 92永遠毋放棄—毅力號火星車 ........................ 95宇宙有偌大 ................................................. 98半導體佮晶片對人類有偌重要？..................... 101世間若無摩擦力會變按怎？ ........................... 105用「船箸」來鋏太空船—太空飛行時代咧欲來矣............ 109卷三│小說巴冷．巴勇．小鬼仔湖 ................................. 114動物國欲選國王囉 ........................................ 143卷四│現代詩陪你朗讀—讀經 ........................................ 148尾指 ........................................................... 151月光埕斗 ..................................................... 153阿爸像風 ..................................................... 155微微仔愛 ..................................................... 157曼波．青春 ................................................. 159尾擺．尾指 ................................................. 162阿爸，你猶原無來予我夢 .............................. 166行佇無聲的雪中 ........................................... 169夠額的繁華 ................................................. 172

商品規格

試閱文字

推薦序 : 咱做伙行這段本土語文路
蔡清華(文藻外語大學師資培育中心講座教授、前教育部政務次長【2016.5-2018.4、2020.6-2023.1】

自從民國 90 年九年一貫課綱開始共國小本土語言成做正式課程了後，本土教育就一直受著社會誠大的重視，到民國 97 年本人擔任高雄市教育局長的時，我就誠致意咧推動本土教育，一直到 105-107 年我借調擔任教育部政務次長的時，本土教育已經漸漸發展甲有一定的基礎矣，等我 109年第二擺擔任教育部政務次長，彼个時陣社會大眾已經會使接受學生仔上本土教育矣。後來，根據國家語言發展法的規定，教育部正式宣佈對 111 學年開始，國中一二年級、高中一年仔的學生，攏愛延續國小本土語文課程，接受本土教育課程，就按呢，向望學生囡仔對國小、國中、高中全面攏會當學習本土語文，這是教育部回應民意的需求，嘛是欲彌補過去本土語文長期無受著重視的一種補償做法。
我佮崇憲老師是佇高雄市教育局國民教育輔導團熟似的。民國 97 年我擔任高雄市教育局長的時陣，高雄市教育局國民教育輔導團就已經有本土語文輔導員，崇憲老師是民國 99-100 年的高雄市本土語言-閩南語專任輔導員，因為任務的關係，我有邀請伊來教育局做本土語言的簡報，嘛予我了解高雄市彼當時學校本土語言教學、教材發展的情形。我知影彼當時高雄市的本土語言發展了誠四序，嘛誠有教學策略，我對高雄市的本土語文發展就足有信心的。
為著欲實踐本土教育，我家己嘛綴學生囡仔去參加閩南語認證報名，綴做伙去考試，體驗學生仔認證考試的過程，彼个時陣我嘛深深了解著，本土語言佮其他的語言仝款，攏是需要有教學方法佮策略的，特別是愛有政府政策的支持，按呢咱的本土語文才袂有斷層。這幾年為著欲呼應社會民意的需要，教育部有舉辦各種層級的會議討論，最後終於公告 111 學年開始，中等教育嘛愛實施本土語文教育，這是教育部的一个重大的本土語文政策。
除了政府的政策以外，教師的教學品質嘛是本土教育成功的重要因素。教育部除了制定政策，嘛有注心佇教師的教學佮教材，所以教育部成立「中央課程與教學輔導諮詢教師團隊」來輔導各縣市老師的教學策略佮教材開發。我知影崇憲老師嘛捌佇 105-107 年，閣有 110-112 年攏佇中央團本土語文組咧為本土語文拍拚，尤其伊閣是過去我佇高雄市教育局輔導團的同仁，就按呢，阮就有一寡仔機會做伙討論本土語文的發展，崇憲老師攏會當提供我一寡仔誠好的想法。毋但按呢，阮閣有做伙去參加公益樂團，表演台語歌曲予病人、老人佮弱勢民眾欣賞，會使講，阮毋但是干焦討論政策，嘛是做伙做公益的好有志。最近崇憲老師講欲出冊，欲共伊過去所寫的台語散文、著獎的文章、科普文章佮台語現代詩集合起來出版，算講是
對伊過去推動台語文的一个總結，伊央我共伊寫序。我咧想，本土語文的發展，毋但是愛有政策佮教學策略爾爾，台語文學的發展對咱本土語文來講，更加是一種拍底的工課。崇憲老師共伊過去臺灣台語的教學、寫作的成果，成做這本《藏佇水底的愛》，我誠鼓勵伊，嘛向望咱本土語文界會當有閣較濟的人來參與寫作，予咱本土語文，毋但只有「講聽讀」，閣會當發展到「寫作」，語言若是會使「文字化、文學化」，這个語言就有機會一直暴穎、生湠。
誠歡喜崇憲老師欲出冊矣，我寫這篇序除了是為伊推薦這本冊，嘛代表我對本土語文的重視佮支持，閣共咱做伙行過的這段本土語文路，留一寡仔跤跡落來。這本冊出版了後，相信會當予閣較濟人了解臺灣台語寫作的媠，嘛祝福咱本土語文政策會使順利實施，予咱本土語文會使世代傳承落去。
—114.01.01 佇高雄

試閱文字

自序 : 人間有愛，咱用台語共寫落來

下港來的囡仔
我這个高雄出世的下港囡仔，一直到去讀師範大學國文系，才有通好去台北蹛。到台北了後，我一下開喙講國語，北部的同學就問講：「你是下港來的乎？」彼个時陣，我感覺我做一个講臺灣國語的下港囡仔，是攏無的𪁎趒代，我嘛無想欲改。等到我大學畢業了後，我轉來高雄教國文，頭起先家己是先拍拚欲共家己的國文教予好，成做一个好的「國文老師」。毋過，時代一直咧改變，佇我教學的頭幾年，拄好搪著母語復興運動，我去予學校派去參加各種的「鄉土語言」研習，嘛受著濟濟 si n-pái 的牽教，就按呢來啟發我的母語意識，我就沓沓仔佇體制內實現我的「母語復興」教學路，路途有偌窵遠我毋知，我嘛不管，橫直「母語復興」的路堅心行落去，就像馬拉松仝款，總是有一工會行到我的目標，這段心路過程，我共寫佇「母語教學．馬拉松」這篇文章內底。

我的台語寫作路
民國 93 年我佇中山大學中文研究所畢業，論文題目是「臺灣閩南諺語的鬼神文化研究」，後來這本論文受著東販出版社的重視，邀請我出版，我就共改寫做一般民眾攏看有的冊，也就是《臺灣台語俗諺鬼神紀事》。自從民國 99 年我去報考高雄市本土語言輔導員了後，我就一直有咧做台語文相關的代誌，後來我佇 105-107、110-112 年擔任中央團本土語文組的組員佮副組長，尾仔才轉來學校內底擔任主任。這段期間，我做過有夠濟佮咱本土語文發展相關的工課佮教材，親像：《品德諺語故事集》、《溫一壺南國的月光—臺灣文學詩的創作文學營》、《啟程》、《傳承》、《高雄市本土語自編教材》、真平九年一貫國中閩南語教科書主編、各種語文競賽佮訓練、教育部文學獎比賽、本土語文（閩南語文）課程綱要課程手冊修訂工作計畫、大學端本土語文教材教法書籍編寫、十二年國教課綱素養導向標準本位評量、國中高中閩南語課文與教案編寫、教育部直播共學教學計畫……等等。每一種工課攏是咧粒積台語文發展的實力，嘛是咧練家己台語寫作的功夫。

各種文體的台語寫作
雖然工課遮爾濟，我嘛誠注心咧提昇家己的台文寫作能力，各種文體我攏想欲試看覓咧。差不多是民國 105 年，我開始佇面冊佮公開場合，開始盡量使用全台文、全台語，親像是 FB 的發文佮各所在的演講，我就以台語發表為主。我若無對我家己開始用全台文，欲按怎共逐家推動台語文，復興母語？就按呢，我嘛開始用台文創作各種文體：散文、小說、現代詩、甚至是科普文章。恁看，宇宙、科學的內容是遮爾仔迷人，我一定愛來寫一寡仔台語的科普文章，予中學生若是想欲看就揣會著。另外一方面，我嘛想欲實踐「用台語寫萬事萬物」的理念，一个語言愛有才調書寫天跤下的各種代誌，這个語言才有法度生湠、傳承落來。

台語記錄世間愛
這本《藏佇水底的愛》，是我個人對一个國文老師轉途來做本土語文老師，一路行來 15 冬左右的文學創作過程，嘛算講是一个階段性的收束。雖然文字無講蓋成熟，雖然文章嘛無寫甲足好，毋過這是我個人上真實的台語文寫作歷程。
人是情感的動物，咱定定攏會予世間種種的人事物來感動，我這本冊內底有寫著：「對爸母的愛、翁某情感、對囡仔的疼痛、對同事的感謝佮毋甘、對社會的大愛、旅行的感想、對生活的感觸、世間一切的美好，愛台語嘛愛家己。」便若身邊的人、社會的事、世間的物，只要有感觸、感想，我就會共寫落來。像我就共對阿母的感恩寫佇〈悾闇囡仔的記持〉、〈阿母的臭汗酸味〉；共我對阿爸的思念，寫佇〈阿爸你猶原無來予我夢〉；〈微微仔愛〉是咧寫我佮阮某輕輕仔微微仔鬥陣咧行；我共我對高雄的感情，寫佇現代詩〈夠額的繁華〉。我嘛共家己去參加紅十字會藏水隊的故事，寫蹛〈藏佇水底的愛〉這篇散文內底；我閣共我去山搪著的鬼仔古，寫做小說〈巴冷．巴勇．小鬼仔湖〉……。遮的文章，全部攏是我咧實踐「我手寫我口，我手寫我愛」寫作理念的歷程。

「有行就有路，有寫就會進步」，台語文的寫作路當然無簡單，毋過，台語文若會當綴著時代的跤步—生活化、現代化，予閣較濟人看著台語文、認同台語文，予台語成做咱後代囝孫攏會感覺驕傲的語言，這款的台語寫作就是一件誠有意義的代誌。向望家己咧做母語復興的過程當中，會使影響愈濟人願意投入台語的寫作，台語寫作者愈濟，咱台語欲流傳、生枝、發葉、傳承的機會就愈大。
來！這馬就邀請各位好朋友來做伙寫作，做伙來共家己的愛佮想法寫落來，予咱台語會當佇臺灣這塊土地永遠釘根代代湠！ ——114.02.01 高雄

最佳賣點

最佳賣點 : 作者王崇憲使用台語書寫各種文體，例如：散文、科普文章、小說、現代詩，實現「用台語寫萬事萬物」的理念，藉此方式把台語傳承下去。