阮TAU TŌ是圖書館 | 誠品線上

阮TAU TŌ是圖書館

內容簡介

內容簡介 ◎代理經銷 白象文化《阮TAU TŌ是圖書館》講述兩位孩童誤入一間神祕老屋，從守書人那裡得知歷史上的焚書行動、當代資訊封鎖與假新聞操作。故事強調閱讀不僅是知識的入口，更是捍衛自由與民主的武器。本書旨在啟發兒童理解「自由並非理所當然」，唯有透過閱讀多元觀點與培養思辨能力，才能在資訊混亂的時代中辨識真相、抵抗威權。

作者介紹

作者介紹 杜信龍◎1981年台南灣裡出世，無受過正式台語教育kap文學訓練。2006中央大學電子電機所碩士畢業，目前外商公司上班。Tòa府城，父母無受siáⁿ教育，厝內底lóng講台語。2013年底開始寫台文，希望能為台語母語傅承下去。

商品規格

試閱文字

推薦序 : ◎Ngô͘ Ka-bêng（台文雞絲麵發起人、打狗台語文促進協會理事）

這本《阮TAU TŌ是圖書館》想欲和囡仔討論--ê，就是眼時情爸母上煩惱ê代誌，網路短片致到思想文化hông洗腦，每1工攏咧面對資訊戰、假消息、諞仙仔。這ê時代囡仔接受--著ê資訊量不止仔大，煞無能力判斷好bái。信龍兄向望咱每1 ê爸母攏有機會和囡仔做伙讀冊，做1 ê有才調獨立思考ê人。

◎推薦人：Nó͘-lah游沛綺
注心拚勢推廣人權教育，已經過身ê作家幸佳慧長時間推廣用繪本古kap囡仔講要緊ê代誌。
《Chhiau-chhōe樹王公》kap《阮TAU TŌ是圖書館》這套繪本tiō是chin好ê例！杜信龍用奇幻弄險、衝突ê故事情節佈局，hō͘囡仔會當進入故事情境，去體會主角所看見ê，誠適合老師ia̍h-sī家長來引chhōa囡仔思考對談，建立思辨ê腦神經迴路、粒積uì多方面去思考代誌ê慣勢，面對現此時網路詐騙假消息、歹心有惡意ê人，會知捌ài保護家己，koh進一步培養公民素養，守護咱台灣猶chin幼茈脆弱ê民主自由。

◎推薦人：阿齊kap阿真

阮阿爸koh再編新ê故事ah，緊來買ŏ͘。

◎推薦人：種籽創意繪本手作坊 葉欣怡

杜信龍先生ê《阮TAU TŌ是圖書館》是一本文字雖bóng簡省，m̄過是足有力量ê台文繪本。作者用生活中人人看得著ê圖書館做起頭，引chhōa讀者思考：原來閱讀並無限制tī建築物內底，是藏tī咱每一个人ê頭殼內、每一段歷史、逐个生活當中。
Tī資訊爆炸、假消息滿天飛ê時代，敢有法度判斷真假、保持批判性思考，比往過更加重要。Chit本冊kā「生活和政治ê相關」ê真實khǹg入去故事內底，hō͘讀者理解：做出選擇進前，咱需要閱讀、分析、思考，m̄是hō͘情緒á是無影ê資訊牽leh走。
冊內底加入「納粹燒書」和《安妮法蘭克日記》ê情節，提醒咱歷史m̄捌離開人ê生活。當知識hŏng限制、當自由hŏng剝削，失去--ê，是人類思考ê能力和尊嚴。
So͘-pái，閱讀m̄-nā是吸收，更加是一種行動力kap執行力；是替家己開一扇窗、為世界照一逝光ê起步。Nā beh保護真理、守護自由，就必須愛對閱讀開始。Chit本冊值得大人kap囡仔做伙讀，mā值得每一个人ê心內起一間細間ê圖書館。


◎推薦人：台語路協會理事長 董力玄

《CHHIAU-CHHŌE樹王公》用科幻ê手路siâⁿ人去思考「咱想beh愛一个啥款ê未來」。故事無提供結局，hō͘讀者真大ê想像空間。

《阮TAU TŌ是圖書館》透過歷史事件，刺激人去關心現實世界「假新聞、思想限制、甚至是戰爭」ê問題——咱著愛靠閱讀訓練思辨能力，才有法度面對未來。

兩本冊lóng對囡仔ê好玄出發，會當延伸濟濟主題，真值得親子共讀，做伙討論。

試閱文字

自序 : ◎杜信龍
序——戰爭tang時來？

Che故事原底是beh寫去比賽用--ê （2021.8.26），結果無tio̍h等，khǹg beh 3、4冬。Taⁿ，koh再回收利用。總--是，故事內容大改。

編故事ê源由lóng是beh陪伴gín-á，kap in講母語，講學習、閱讀jōa重要⋯⋯等等。Taⁿ後來ke 1 kóa社會、國家ê代誌，ǹg望in對未來有所可能ê變化ē-tàng理解，甚至有1 kang有反抗che獨裁ê勇氣。Che mā是咱對所有ê台灣人想beh講--ê。

對家己ê土地，iah是未來，歷史tiāⁿ-tio̍h ài思考，m̄是獨獨陷tī khang-khòe，現實經濟方面ê成長。無民主、自由，chóaⁿ樣有可能有人權？Ta̍k kang lóng有隔壁ê歹厝邊來恐hat，受驚惶，戰爭m̄知tang時ē來，總--是，閃ē過1世紀？咱tō m̄ thang欺騙家己。

戰爭kám有jōa hn̄g？Chit 1、2、3冬，尤其chit站á 4、5、6--月ê新聞，看來百面tō是kéng日子beh拍--ah。時間chhun jōa chē m̄知niā-niā。

Ah nā án-ne，到底beh直接投降？放棄？Siàu想對敵ē留咱1命？甚至保有家己ê財產、土地？有影是gōng kah bē pê癢。自古以來共產主義，法西斯tō lóng m̄是án-ne。Ē有che天真ê想法，代表過去國民黨ê洗腦教育有成功，hō͘咱無思考ê法度。

台灣目前kám tō ài行到chit步？Thái-tó看家己無夠重？M̄是阮人厚神經，實在che無法度tèⁿ無看--得。

Che繪本siōng大ê ǹg望，是咱讀者ē-tàng看khah hn̄g--leh，m̄ thang koh相信世界太平chit款hàm古。自我防備、武裝，心防，koh有知識ê精進是bōe-tàng無--ê。Che需要每1 ê人ê力量，每1 ê人khiā--出-來。無che意識，tō親像kan-taⁿ cheng-seⁿ-á gōng-gōng-á過，等人來lia̍h去食。

Tio̍h，無法度思考，he是欠缺閱讀，欠教育。Che mā是過去獨裁者無愛人去閱讀，用集中營洗腦ê方式kā人ê精神lut khah無chhun。

當然，行動是伴相隨。Ē講bē做、有讀無做，che是大多數人ê慣性。有大量ê閱讀，幼幼á讀1 kóa經典，內化chiâⁿ做底蒂，落尾行動，chiah ē有力頭。Ǹg望我ê kiáⁿ、kap讀chit本冊ê讀者，ē-tàng建立厝內kap心肝頭內ê 「圖書館」。阮想che應該對目前世代是真需要--ê，無論講是AI世代，iah是對抗極權。

Siōng尾，想tio̍h John Adams chit 2句話：

「阮必須ài學習政治kap戰爭，án-ne阮ê kiáⁿ tō有可能好好á去學習數學kap哲學。咱ê kiáⁿ應該去學習數學、哲學、地理學、自然歷史、行船、商業kap農業，án-ne hō͘ in ê gín-á有機會去學習畫圖、詩歌、音樂、建築、雕刻、編織、lia̍p瓷á。」

「民主chêng到taⁿ lóng bē久長，真緊tō開始lám-nōa、sāi-thái，甚至自chhōe死路。」

阮m̄知chit本冊出版ê時，時勢ē án-chóaⁿ來變化。Taⁿ，ǹg chit日來ê時，咱lóng有勇氣來面對。

2025 nî 6 goe̍h 15.

最佳賣點

最佳賣點 : ◎一本用閱讀照亮生命的作品。閱讀是力量，帶來反思與自由，成為抵抗威權最溫柔的武器。