台灣動物來唱名: 台語動物圖鑑 | 誠品線上

台灣動物來唱名: 台語動物圖鑑

內容簡介

內容簡介 ☆☆台灣第一本台語動物圖鑑☆☆ 彼是啥物？彼敢會當摸？ 彼敢會當食？彼敢會當飼！ 予囡á學台語，看生態，se̍k-sāi台灣動物 《台灣動物來唱歌》作者最新作品（附線頂影片) ▌認捌台灣原生動物ê台語名 台灣有足phong-phài ê生態資源，hām足濟迷人ê原生動物，Iá-m̄-koh你kám知影in ê台語名號做 siáⁿ？ ▌80種台灣原生動物ê影像、紹介、影片 本冊收錄80種台灣原生動物ê影像、台語名kiau in ê紹介，koh有圖鑑影片hō͘你聽看，邀請逐家kap囡á做伙用台語來se̍k-sāi咱台灣ê生態。 本書依哺乳類、鳥類、爬蟲類、兩棲類、魚類、昆蟲類及其他等七大類群編排，精選收錄80種台灣原生動物，介紹其台語名稱、生態特性與相關知識。全書以台語文撰寫，透過全彩照片與影音資源，帶領讀者系統性學習各種魚、鳥、蟲、獸的台語名稱，深入了解牠們的生活環境與生態習性，在學習台語的同時，也培養對台灣自然生態的認識與關懷。 【讚聲推薦】 國立臺中教育大學台灣語文學系副教授 ｜丁鳳珍 李江却台語文教基金會執行長｜陳豐惠 國立海洋生物博物館研究員｜陳德豪 國家海洋研究院副院長｜張至維 國立中興大學昆蟲學系教授兼系主任｜葉文斌 國立臺灣大學昆蟲學系特聘教授｜楊恩誠 國立中興大學昆蟲學系退休教授｜楊曼妙 （以姓名筆劃順序）

作者介紹

作者介紹 文字 周俊廷 Chiu Chùn-têng獨立影像工作者、台語生態 chhōa 路蟲。中興大學昆蟲學系學士、東華大學海洋生物研究所碩士。Chù-sim leh 做兒童少年、普及科學、生態紀錄影像製作 kap 台語自然生態行踏 ê 教育 khang-khòe，借用無 kâng ê 媒介 kiau 角色，ín-chhōa koh-khah chē 人行入大自然，營造全台語ê母語環境--lìn。視覺 莊棨州 Chng Khè-chiu自由工作者。臺灣大學昆蟲學系碩士，中山大學生物學系學士，專長是昆蟲生態、野生動物保育、特殊動物伴 ê io-chhī。Kah-ì jīn-bat 草木鳥獸 ê 名，常在 tī 山林河海活動。意外展開插畫、設計 ê 路途，用圖文來 chiâⁿ-chò 生態保育推廣 ê 工具。

產品目錄

產品目錄 作者序飼奶類。花鹿仔。羌仔。水鹿。山羊仔。山貓。棕蓑猫。羌仔虎。花面猫。烏熊。果子猫。鯪鯉。山豬。紅腹膨鼠。白面飛鼠。猴山仔。大夜婆。狐狸密婆。破雨傘鯃。尖嘴仔。粉鳥鯃。棺柴頭海翁鳥仔類。粉鳥鷹。南路鷹。烏箭翎。獵鷂。角鷹。蛇鷹。紅目孤黃。猴面鷹。花仔和尚。長尾山娘。紅嘴筆仔。山暗光。釣魚翁。烏鶖。塗豆鳥爬趖類。杜定。草龍。肥豬仔。雨傘節。飯匙銃。百步蛇。龜殼花。赤尾鮐。長尾龜兩棲類。台灣螿蜍。田蛤仔。鳥蛤仔。翡翠青虳。南湖塗龍魚仔類。一枝花。狗𩸶仔。硿鏗仔。長獅。豆腐鯊昆蟲類。田嬰。秤仔。水田嬰舅。角田嬰舅。牛角𨂿。寶石蟲。紅頭司公。鹿角龜。尾蝶仔。蛾仔。翹尾仔狗蟻。虎斑塗甕仔蜂。暗蟬。草猴。草蜢仔。杜伯仔。杜蠍仔。草雞仔。竹馬。水虼蚻。厝白蟻其他類 。蜈蚣蛸。海南戇。牛 áiⁿ 仔。海神海麒麟 中台語動物名稱對照表中台語分類名稱對照表

商品規格

試閱文字

自序 : 作者序／周俊廷
阮牽手講：「若是ē-tàng用一款語言，去學tio̍h新ê物件，án-ne chit个語言tio̍h bē 死--去」。

自細漢到大漢，我用台語學--tio̍h ê動物名lóng是金龜仔、田嬰、chiuⁿ-chî chit 款幼稚園to̍h知ê簡單名詞，讀冊ê過程所認pat ê物種名、專有名詞kah學科術語，雖然是愈來愈幼路、愈來愈專業，m̄-koh，he lóng是中語--ê。Che kám台語ê問題？台語tòe人bē tio̍h？M̄是，che是政府語言政策ê關係。本土語言to̍h親像hō͘人關tī 無法度見光ê地下室，無才調 tòe 時代來發展，m̄-chiah真濟物種kan-na chhun 普通 ê 名，to-ā m̄是台語人無才情thang tòe時代進步來發展khah幼路ê術語，是因為國際學術leh進步ê時，lóng是用原文kah中文傳入來台灣，tì kah差別愈來愈大，本土語言chū-án-ne chhun日常話語 thang 用。

Chhiâng-chāi有人問我：Kám有法度全部用台語講昆蟲、動物ê生態？讀冊ê時chūn ē-hiáu用中語、英語做簡報、報seminar，哪有hit款道理無法度用台語講？有人會講我平常時仔lóng講台語--ā，m̄-koh欲講khah專業--ê soah無法度--伊。He to̍h是咱講台語ê能力kan-na chhun ē-hiáu講生活用語niā-niā。Án-ne beh án-chóaⁿ？ 江湖一點訣，其實無phiat-pō͘（撇步），to̍h是逼家己捷練習niā-niā。

若是beh練習，tú-tio̍h bē-hiáu--ê beh án-chóaⁿ？咱ē-tàng先去查字典、chhōe資料，hoān-sè原底to̍h有台語詞thang用mā無的確。若無to̍h是請教做hit途ê人，看kám有在來ê語詞 thang用。若是lóng無，咱ē-sái對原文來翻譯，抑是kā當做外來語來用。Ko͘-put-jî-chiong 咱chiah用中文來翻譯，án-ne講是因為二次翻譯往往會cháu-cheng--去，koh再講中文tiāⁿ-tiāⁿ簡省文字，若是照翻做台文，hoān-sè連阮阿媽mā聽無。Koh來to̍h是翻譯ài照台語ê邏輯、理路，ài保留台語ê氣口。若是翻譯行bē通，咱chiah來創新詞，仝款ài照台語ê構詞邏輯kah理路來思考。Sòa--o̍h，to̍h是大聲講，hō͘人聽--tio̍h chiah有人ē回應。好聽、好講、好用，to̍h ē 湠出去，若無，to̍h 準做 ē hŏng tô-thài（淘汰）mā無要緊。

像「獨居蜂」chit个詞，英文號做solitary bee，是leh講一 tīn kah社會性蜂類相對ê蜂，in lóng孤身活動無kah人tòa做伙，mā無社會階級、無分工。M̄-koh「獨居」直接用台語講真怪奇，m̄-chiah阮to̍h照chit款行爲，配合台語ê理路，kah大人囡仔做伙討論，創造出「ko͘-khiā-phang（孤徛蜂）」chit个詞。

這本圖鑑m̄-nā 是án-ne，阮想beh hō͘ 一寡無名ê物種，有一个台語名，hō͘一寡普通leh講 ê名詞ē-tàng kā 分khah幼。雖然有ê朋友、siăn-pái（先輩）ē講：「Ah che本底tio̍h無台語名--ā，咱tio̍h講in ê中文名tio̍h好。」M̄-koh 咱若無án-ne「ngē做」，咱ê語言to̍h無法度tòe時代成長，hō͘伊有新ê性命，伊若ē-tàng日日正常發展，án-ne咱to̍h毋免煩惱 in ē消失去。Ah che mā是每一種語言逐工四常leh做ê代誌，só͘-pái kā生物分類ê系統台語化，我認為咱tio̍h-ài來做chia-ê代誌。

以早ê人用一个普通ê詞to̍h tī社會走跳，che mā龜仔、he mā龜仔，m̄-koh咱若kā系統建立起來，分khah幼leh，to̍h ē-tàng 分做「金龜仔、剪龜仔、鹿角龜、牛角oaiⁿh、寶石蟲」。咱lóng知台語tī台灣有地方差，仝一種蟲tī台灣南北有兩款名，有時koh-ē 南北 têng-tâⁿ。我早前ê khang-khòe to̍h bat 為tio̍h一尾蟲，學名是Tarbinskiellus portentosus，tī阮台南號做tō͘-peh-á（杜伯仔），tī台北叫tō͘-kâu（杜猴），hō͘我ê台北頭家「指導」講tō͘-kâu chiah是標準答案，chit款chhiò-khoe ê代誌。

全世界lóng知影，每一款物種lóng有一个用拉丁文字表示ê名，用二名法ê原則來號ê「學名」，是國際通用ê名字，ē-tàng講是chit款物種ê世界名片。Chhun--ê m̄管siáⁿ-mih語言號ê名，lóng是「俗名」，逐个lóng ē-tàng號，濟人講tio̍h tiâu名，成做約定ê名稱。M̄-koh tī 學術界，mā-sī有聲音希望逐个leh號俗名ê時chūn，mā ài 有系統化ê原則來處理。

這本冊beh做--ê，to̍h-sī kā台灣動物ê台語名khioh--tńg來。古早人號ê名，lóng有足濟ê文化意義tī內底，物種、類群ê名若是無清楚--ê，咱to̍h kā in系統化來創hō͘清楚，無名--ê kā in號名，hō͘ 逐个來討論（來oan-ke？）、hō͘ 逐个做伙來se̍k-sāi chit 80種動物，做伙來chhiàng in ê台灣名。

「學母語、學生態，是ē-tàng同齊來做ê代誌」！

多謝hō͘我攪吵、請教ê老師、siăn-pái。多謝我ê視覺設計、生態顧問、台語顧問kah編輯，kah我做伙思辯、討論。多謝所有提供相片ê攝影師朋友。Lo̍h尾beh the̍h chit本圖鑑，紀念羅賓ê學生柏元，kah我ê兄弟老猴。多謝有恁！

最佳賣點

最佳賣點 : ☆☆台灣第一本台語動物圖鑑☆☆

彼是啥物？彼敢會當摸？
彼敢會當食？彼敢會當飼！

予囡á學台語，看生態，se̍k-sāi台灣動物

《台灣動物來唱歌》作者最新作品（附線頂影片)