臺語演講三五步: 指導大人演講比賽ê祕笈 | 誠品線上

臺語演講三五步: 指導大人演講比賽ê祕笈

內容簡介

內容簡介 ｜最實用的臺語演講教戰手冊｜ 20餘年臺語演講比賽第一線指導經驗之大成 跳脫臺語僅能使用於日常之迷思 羅列常用俗諺、重要學術名詞等，擴大臺語使用之範圍 除增進臺語文能力，更可從本書體會臺語之美 本書循序漸進從理論到實務，演講內容端也從簡單的名詞到整篇的解析，適用於入門與進階者。 ▍本書特色1－理論Ｘ實務 ◎為演講打好基礎 啥物是演講｜演講ê基本修為｜演講ê通則｜演講ê準備｜常在講毋著ê音佮調｜講正港ê臺語詞｜講合味ê臺語句 ◎從實務累積經驗 即席演講ê題目｜演講ê審題佮拆題｜完整ê結構設計｜ 大綱設計舉例｜顯頭、媠尾、演中央｜臺風原則佮訓練 ▍本書特色2－最好的實戰手冊 ◎收錄演講題目 臺灣俗語真趣味｜我學臺語ê經驗｜講咱臺灣人ê禁忌｜臺灣歌謠鄉土情｜欲按怎創造臺灣新文化？｜啥物是臺灣ê價值？｜我上欣賞ê運動員｜臺灣是一个海洋國家…… ◎羅列精選俚語與例句 歹勢一時，慣勢就好。｜歹勢食無份，慣勢面袂紅。｜毋管好囝、歹囝，攏是龜跤龜內肉。｜尪姨順話尾，假童害眾人。｜媠，媠無十全；䆀，䆀無加圇。 《臺語演講三五步》 毋但是指導大人臺語演講比賽ê祕笈， 閣是順利通過臺語認證B級C級ê工具冊， 對欲學臺語ê人幫贊嘛真大。 ．若準我毋講母語(族語)，欲叫啥人講？ ．若準我佇生活中毋講母語(族語)，啥物時陣講？ ．若準我上課毋講母語(族語)，欲按怎予母語(族語)有價值？ ．若準我佮序細講話毋講母語(族語)，欲按怎共母語(族語)傳予後代囝孫？ ｜母語教育宣言｜ 一、任何語言攏是人類共同ê遺產，攏必須受制度ê保護和提供永續發展ê機會。 二、母語（族語）教育是天賦人權，不容剝奪。 三、母語（族語）教育必須生活化、文字化、文學化和社會化才會成功。 四、母語（族語）文字化ê原則是科學化、簡單化、優美化佮國際化。 ｜咱主張｜ 一、對幼稚園到大學，攏愛有母語〈族語〉ê課程，並且列入升學考試ê科目。 二、用制度救母語，從事國家公務ê人員，攏愛通過本土母語〈族語〉ê認證。 三、設立「傳統語言區」，規定當地路標、招牌，議會開會，必須愛用傳統語言。 四、設立母語〈族語〉ê「國家文學獎」，提升母語〈族語〉ê地位。 五、訂定「語言保護法」，規定各發行報紙應有一定比例ê本土母語〈族語〉欄。

作者介紹

作者介紹 劉明新劉明新臺灣文史工作者。 筆名劉方、東部客，臺灣臺東人，1958年生，臺東師專、師範大學畢業，師大臺文所，臺灣教師聯盟1993、1994年秘書長；1998、1999年會長。1995年臺北縣第一個教師會─新埔國中教師會創會會長；1999年─2005年，慈林和樂讀書會會長；1994年─2009年，核四公投促進會志工。2003年教育部高中國文課程暫行綱要《九五暫綱》編修委員；2006教育部「國高中國文課程綱要專案小組」委員；2007年教育部高中國文課程綱要《九八正綱》編修委員；2014-2018。「人民作主教育基金會」常務董事兼執行長。 自戒嚴時期即投入臺灣民主、社會運動，演講、座談會、示威、行軍、編教材等凡三十餘年。參與母語運動，擔任臺語文指導老師、師資認證口試委員、臺北縣母語教材編輯，目的在推廣教育臺灣化的全面落實及「隔代改造」臺灣人的國民意識。

產品目錄

產品目錄 踏話頭 體例說明 壹、理論篇 第一課 演講真重要 第二課 啥物是演講 第三課 演講ê基本修為 第四課 演講ê通則 第五課 演講ê準備 第六課 常在講毋著ê音佮調 第七課 講正港ê臺語詞 第八課 講合味ê臺語句 貳、實務篇 （大人組） 第九課 即席演講ê題目 第十課 演講ê審題佮拆題 第十一課 完整ê結構設計 一、三段論述法 二、四段論述法 三、五段論述法 第十二課 大綱設計舉例 一、講寡俗語予恁聽 二、母語ê重要性 三、我所知影ê八田與一 第十三課 顯頭、媠尾、演中央 一、顯頭 （一）實例故事法 （二）解說題意法 （三）請教問答法 （四）創意鬥句法 （五）俗語點題法 二、媠尾 （一）、前呼後應法 （二）、要點歸納法 （三）、提出精義法 （四）、行動呼籲法 三、演中央 （一）、 分項論述法 （二）、 因果推論法 （三）、 正反論述法 第十四課 臺風原則佮訓練 一、臺風原則 二、表情、眼神訓練 三、手勢原則 四、手勢分類 五、手勢綜合練習 六、上臺訓練：實際操演 七、觀摩比賽影帶 參、基礎篇 第十五課 臺語演講ê修辭 第十六課 演講ê名言佳句 第十七課 臺語鬥句真好聽 第十八課 臺語演講俗語篇 第十九課 心適ê孽譎仔話 肆、證據篇 （演講ê言辭證據） 第二十課 統計 第二一課 定義 第二二課 類推 第二三課 報導 (一)臺灣類 (二)教育類 (三)環保類 (四)社會類 (五)時事類 第二四課 笑話 第二五課 逸事 第二六課 故事 人物篇／哲理篇／教育篇／環保篇／ 【後記】母語ê真義

商品規格

最佳賣點

最佳賣點 : ｜最實用的臺語演講教戰手冊｜

20餘年臺語演講比賽第一線指導經驗之大成

跳脫臺語僅能使用於日常之迷思
羅列常用俗諺、重要學術名詞等，擴大臺語使用之範圍
除增進臺語文能力，更可從本書體會臺語之美

試閱文字

自序 : 踏話頭
這本冊ê內容，是我二十外冬來，佇新北市(以早臺北縣)指導臺語演講大人組ê選手，所使用ê教材佮長年累積ê經驗，共抾做伙ê成果。佇2009年，我第一擺共我集訓選手ê資料編做一本講義，名稱就叫做《臺語演講有撇步》，這馬欲正式出版矣，因為冊名驚去佮人傷相仝，就謙卑共號做《臺語演講三五步》，表示伊干焦是三五步ê基本功夫爾。愛特別感謝ê是，佮我同齊訓練選手ê同工，因為予我誠濟啟發佮幫贊，若無，這本冊就無法度出版矣。
當然，這本冊ê內容，除了我家己長久以來累積ê經驗佮看法，嘛愛感謝真濟幕後英雄。是提供我智識ê專家學者佮各種網站ê資料，其中有歷史、生態學家ê著作，文學家ê作品，嘛有文化性網站ê豐富內容，以及政府網站ê正確資訊。遮ê著作佮網站，攏予我佇咧編寫這本冊、共資料改寫做臺文ê時，有真大ê貢獻。特別是佇演講ê「言辭證據」這方面ê資料蒐(soo)集，咱攏無法度避免愛去參考遮ê智識佮資訊。
想欲出版這兩本冊有三个動機：幫助參加臺語演講ê選手，共指導演講ê老師佮家長鬥相共，以及為推展臺語文盡一份力。三个動機攏誠單純，毋過目標真懸，是毋是有才調達成，攏愛試看覓才會知。
其中，第三點特別困難。因為佇推展臺語文ê過程中，咱會拄著：學生袂曉講、家長無重視、老師應付、母語ê語言環境愈來愈䆀，以及政客、教育官員對本土語言無理念，四常放屁安狗心，予咱聽甲咬牙閣切齒，強欲去舂壁！
我想，欲救臺灣話，上重要ê干焦三條路：
第一條，對幼稚園到高中攏愛有母語ê課程，逐禮拜三節課以上，並且欲升高中佮大學，攏愛認證一種本土語言，及格ê才有資格升學。這是政策問題，需要有智慧佮決心ê本土政權，做政治解決。
第二條，予母語有實用ê價值。愛立法規定，欲去原住民、客家人、抑是hō-ló人佔多數ê縣、市、鄉、鎮服務ê公務人員，包括老師、警察、稅務、鐵路局、地政人員、公所辦事員等等，攏愛通過當地本土語言中高級以上ê認證。無，就袂當錄取。
第三條，予母語生活化、教育化。無論是佇家庭、教室、抑是公共場合，攏愛慣勢講母語，老師上課嘛用母語教學(這就是「浸水式」ê教學)，按呢才有法度營造(îng-tsō)較好ê母語環境。若無，本土語言、咱ê族語，會漸漸無去ê運命，是一件無法度挽回ê代誌矣！
出版這本冊，毋敢有傷濟向望，講按呢就有夠額矣。

Lâu Bîng-sin 2018.12

試閱文字

內文 : 體例說明
一、這本冊大部份攏用台文書寫，干焦一寡「注解」，比如：「近山剉無柴，近溪擔無水。」（注解：反諷人佔有優勢反而不知努力，便會造成失敗。）佮「法律文件」，比如《教育基本法》、《國家語言發展法》等，保留華語書寫。而且漢字一律採用教育部用字，拼音也是用教育部ê台羅拼音。
二、有必要ê時，直接佇漢字ê後壁注台羅拼音，譬如：臭跤液(tshàu-kha-sio̍h)、關門著閂(tshuànn)、支(tsi)肺管、坱埃(ing-ia)佮垃儳(lâ-sâm)、雙跤走甲欲牚(thènn)腿、有感覺咧搟(hián) ê時間誠久、物價已經佮歐洲接軌（kuí）。
三、若須要注音ê字傷濟，就佇段落ê尾後集中做注釋，譬如：
注鼢，音bùn，對土裡鑽出來。
注液態，音i̍k-thāi；液體ê狀態。
注粒徑，音lia̍p-kìng；徑，kìng，直徑ti̍t-kìng。
四、若需要用英文字詞做補充解說，嘛直接佇台文字ê後壁做補充解說，譬如「冰蓋」（ice sheet）、『聖保羅』（St Paul）、英國科學家『赫胥黎』（Huxley）有一擺受邀請去『都柏林』(Dublin)演講等等。
五、書寫台文ê數字，盡量用阿拉伯數字。譬如：1947年2月、2萬9千箍、狗頭鷹(兀鷲)會當活35年。
六、若準需要直接翻譯華語ê語詞，抑是用台語音唸出新ê詞語，本冊攏盡量採用文讀音。譬如，懸浮微粒，音hiâm-hû-bî-lia̍p、液態，音i̍k-thāi；粒徑，音lia̍p-kìng；直徑，音ti̍t-kìng。
七、佇書寫方式這方面，咱原則上採用「漢羅並用」，漢字為主，羅馬字做副，並無主張愛全漢字。所以，「的」這字，若是做「連詞」「語氣詞」，咱攏用「ê」代替，干焦「的確」佮「目的」遮ê詞，咱會寫做「的」確、目「的」。我認為這是「漢羅並用」ê第一步。其他比如講：kha-báng捾咧四界走、sànn著頂腹蓋、毋管是ho-ló抑是客家、hőng講甲無一塊好、伊tsua̋n跋倒……，遮ê語詞，咱攏用漢羅方式表示。
八、我認為，台語文袂當干焦停留佇「生活語詞」ê層次，欲擴大使用ê範圍，的確就愛向「教育語詞」與「學術語詞」來行，才會愈行愈大範。所以佇論述ê時，免不了愛直接翻讀華語詞ê需要。語言免不了會互相影響，翻讀久就是咱ê，慣勢會變自然，直接翻讀ê華語詞，歸尾就會變做咱台語詞ê一部份矣。譬如講：拍開咱台灣創作歌謠ê「序幕」(sū-bōo)、守秩序(tia̍t-sū)、負(hū)生長、供(kiong)需失衡、石油耗(hàu/mauh)盡等等。遮ê詞若無直翻，就真歹去揣著適當ê台語詞。
九、另外，嘛袂因為欲強調口語化，就共「最大」一定愛講做「上大」；「我和同學」，一定愛講做「我佮同學」；「首次」嘛免一定著講「第一擺」；「人與(í)自然」「人與(í)社會」，嘛免一定愛講做「人佮自然」「人佮社會」。其實，「最」、「上」，兩字並用；「與」、「和」、「佮」、「參」，四字嘛插咧用。只有按呢擴展，台語語詞才會愈用愈濟，表意ê範圍才會愈來愈闊，嘛會像英語愈來愈大範。
十、為著體貼讀者，對變調ê處理，必要ê時，直接佇羅馬字面頂標數字，表示聲調變化。比如講：外籍(tsi̍k8-4)新娘、東倒(tó2-1)西歪、山頂(tíng2-1)尾溜等等語詞。
十一、對部份猶無法度用台語音表達ê語詞，抑是台語界猶無共識ê外國人ê姓名，抑是專業名詞，咱攏直接唸出華語音，並且遵照教育部ê規定，以雙引號『』註記，比如：予『卡特』總統失業、1863年『林肯』佇『蓋茨堡』演講等等。

第七課：講正港ê台語詞
學語言，語詞毋是萬能，毋過無語詞就萬萬不能。
台語演講愛用正港ê台語講，才會媠氣好聽，這逐家攏知。毋閣啥物是正港ê台語詞？咱就愛先斟酌一下。我認為定義干焦一个：佇目前ê時間點，這種語言佇語詞、語法頂面，上傳統閣上普遍ê講法，這種語詞就叫做「正港ê台語詞」。
毋過，語詞欲「上傳統閣上普遍」，矛盾一定有，一下無拄好就會冤家量債、諍袂煞。譬論講『腳踏車』這个詞，阿祖ê清朝時代叫做「孔明車」抑是「鐵馬」，阿公ê日本時代就叫做「自轉車」抑是「自輪車」，到阿爸ê國民政府時代，受華語影響，直翻ê「跤踏車」就漸漸變主流矣。按呢，到底啥較「正港」咧？時間若到，「副港」「跤踏車」敢袂變做「正港」？
其實，佇目前ê時間點，「孔明車」、「鐵馬」、「自轉車」、「自輪車」攏算正港，毋過講「跤踏車」ê人煞愈來愈濟，咧欲變做「上普遍ê講法」矣，會使講愈來愈正港矣，你敢會當講伊毋是「正港ê台語」？
所以，語詞無絕對，「正港」、「無正港」攏是相對比較出來ê。學語言ê人，攏愛用歷史(時間)佮生態ê眼光來看語詞ê演變，愛學會曉包容，知影語言是會變化、生死ê，也會使並存ê。佇歷史ê演變裡，有ê語詞會換新，有ê語詞會消失；有ê語詞會漸漸退「時行」，有ê語詞會漸漸變「流行」，嘛有ê語詞會當繼續並存使用落去，這是真自然ê好代誌。因為吸收較濟新ê語詞，講法自然五花十色，會當予咱ê台語語詞愈來愈豐富，文學性佮性命力就愈來愈強。
不而過，包容是包容，原則不可無。佇目前ê時間點，咱咧做台語演講ê時，猶原愛使用，「較」傳統、「較」正港ê台語詞，盡量避免直翻ê華語詞，才會媠氣閣好聽，嘛愈聽愈紲拍。下面遮ê華語佮台語語詞ê比較，予各位有志做參考。

(一)名詞
1.【學生囡仔類】華語詞→台語詞
01.童謠→囡仔歌。
例：伊真gâu唱囡仔歌。
02.小朋友→囡仔兄、囡仔姊。
例：咱兜ê囡仔兄轉來矣。
03.開心果→消氣丸仔、糖霜丸仔。
例：古錐的囡仔是爸母ê消氣丸仔。
04.溜滑梯→跙(tshū)溜籠。
例：跙溜籠，愛細膩 (sè-jī/suè-lī)。
05.翹翹板→吭翹板(pán/pang)。
例：囡仔真愛耍(sńg) 吭翹板(pán/pang)。
06.倒栽蔥→倒頭栽、倒摔向、吭跤翹(khōng-kha-khiàu)。
例：你若無坐好，等一下就會倒頭栽。
07.寒假、暑假→歇寒、歇熱。
例：學校這馬歇熱，阮毋免去上課啦！
08.搖籃→搖笱(kô)。
例：台灣島敢(kán)若是一个搖笱，予太平洋輕輕仔搖。
09.橡皮擦→拊仔(hú-á)、拭仔(tshit-á)。
例：提拊仔拊(hú)予清氣。(拿橡皮擦擦乾淨。)
例：你ê拭仔敢會當借我？(你的橡皮擦能不能借我？)
10.板擦→烏枋拭仔。
例：你去叫遐ê學生仔，提烏枋拭仔共烏枋拭拭咧。
(你去叫那些學生拿板擦把黑板擦一擦。)
2.【運動遊樂類】華語詞→台語詞
01.游泳→泅水(siû-tsuí)。
例：今仔日風誠透，恁莫(mài)去海邊仔泅水。
02.賽跑→走標、走相逐(tsáu-sio-jiok)。
例：「走標」是平埔族ê文化之一，就是佇祖靈祭，uān-nā祭祖，uān-nā予未成年ê少年家比賽走相逐，嘛成做 ê成年禮，看啥人走第一，搶著標旗，就有賞賜。
03.打籃球→拍籃球。
例：學生囡仔攏真愛拍籃球。
04.踢足球→踢跤球。
例：巴西人真愛踢跤球，是公認ê「跤球王國」。
05.打排球→拍排球。
例：拍排球，愛較躼(lò)跤ê人較有利。
06.打高爾夫球→拍山球。
例：伊退休了後，真愛拍山球。
07.盪鞦韆→幌韆鞦(hàinn-tshian-tshiu)。
例：囡仔人愛幌韆鞦(幌公鞦)。
08.捉迷藏→覕相揣(bih-sio-tshuē/bih-sio-tshē)。
例：覕相揣誠好耍。
09.捉迷藏→掩咯雞(ng-ko̍k-ke/kue　又唸做am-ko̍k-ke/kue)。
例：咱逐家做伙來掩咯雞。
10.潛水→藏水沬(tshàng-tsuí-bī)。
例：伊定定去海邊仔藏水沬。
3.【身體器官類】華語詞→台語詞
01.面孔、五官長相→尪仔頭，
例：伊ê尪仔頭袂䆀。
02.姿色→面水bīn-tsuí，
例：彼个查某囡仔面水袂䆀。(那個女孩子姿色不錯。)
03.身上→身(sin)軀頂。
例：伊ê身軀頂生粒仔(senn-lia̍p-á)。
04.身上、隨身→身軀邊sin-khu-pinn。
例：我身軀邊無紮(tsah)半角銀。
05.雙眼皮→重巡(ting-sûn)。
例：伊ê目睭有重巡，真媠(suí)。
06.體質、健康狀況。→身命。
例：伊真荏(lám)身命。(他的體質真差。)
07.下巴→下頦(hâi)。
例：愛講話ê人，會予人講是落下頦。
08.膝蓋→跤頭趺(u/hu)。
例：彼个囡仔跋倒，跤頭趺受傷。
09.腳後跟→跤後蹬(tenn)。
例：伊ê跤後蹬去予車挵(lòng)著。
10.腳踝→跤目。
例：做激烈ê運動進前，跤目愛先動動咧。
11.腳模→跤模(kha-bôo)。
例：大跤模，較歹買鞋。
12.腳掌、腳丫子→跤捗(pôo)。
例：古早時代，散食家庭ê查某囡仔才有大跤捗。
13.小腿肚→跤後肚(kha-āu-tóo)。
例：跤後肚(kha-āu-tóo)傷粗，誠歹看。
14.肩胛骨→飯匙骨。
例：伊發生車禍，肩胛頭挵一下，飯匙骨煞斷去。
4.【日常食物類】華語詞→台語詞
01.虱目魚→麻虱目仔。
例：麻虱目仔，屏東地區叫做「海草魚」。
02.黑鮪魚→烏甕串(oo-àng-tshǹg)。
例：烏甕串，是屏東東港地區ê三寶之一。
03.竹筴魚、四破→四破、巴郎(pa-lang)。
例：巴郎好食毋分翁。
(太太覺得「竹筴魚」太好吃了，都捨不得分給丈夫吃呢。)
04.鰆魚(土托魚)→馬鮫(bé-ka)、塗魠(thôo-thoh)魚、鰆仔魚。
例：伊誠愛食塗魠魚羹麵，一改攏愛食兩碗。
05.鳳梨→王梨。
例：毋是賣王梨定定來，毋是賣蓮霧定定有。
06.米湯→泔ám。
例：散赤人啉泔(lim ám)過頓。(喝米湯度日)
07.稀飯→泔糜仔→ám-muê/bê-á　又唸作ám-muâi-á。
例：啉泔糜仔食袂飽。
08.米酒→幌頭仔(hàinn-thâu-á)
例：頭家，閣來一罐幌頭仔。
09.豆豉→蔭豉仔(ìm-sīnn-á)。
例：蔭豉仔排骨真好食。
10.山藥→淮山(huâi-san)、柱薯(thiāu-tsî/tsû)、田薯。
例：淮山好食物(mih)，毋過價數有較貴。
11.小黃瓜→瓜仔哖(kue-á-nî)。
例：瓜仔哖農藥噴上濟，欲食愛先洗清氣。
12.脂肪層，豬羊等牲畜皮下的脂肪層。→膩瓤jī/lī-nn̂g。
：肉瓤bah-nn̂g(脂肪層)，例：肉瓤(nn̂g)油食傷濟會中風。
：瓜瓤kue-nn̂g(黃瓜、香瓜、苦瓜等瓜果類裡層混種子部分之通稱)，例：瓜仔瓤(nn̂g)愛挖掉才會使煮。
13.辣椒→薟薑仔hiam-kiunn-á、薟椒仔hiam-tsio-á、番薑仔huan-
kiunn-á。例：薟薑仔袂當食傷濟，會傷胃，閣對目睭無好。
14.蠶豆→蠶豆tshân-tāu、馬齒豆bé-khí-tāu、齒豆khí-tāu。
例：蠶豆芳芳真好食，毋過有蠶豆症ê人袂當食。
15.糖醋魚→五柳居ngóo-liú-ki/ngóo-liú-ku。
(菜餚名稱，一種台灣閩南菜系的糖醋魚烹調法。)
例：較早，阿公是出名ê總舖師，真gâu做五柳居。
5.【動物鳥仔類】華語詞→台語詞
01.黑面琵鷺→烏面抐桮oo-bīn-lā-pue。
例：烏面抐桮的喙親像是一枝抐桮。
02.斑文鳥→烏喙筆仔oo-tshuì-pit-á。
03.烏頭翁→烏頭鵠仔oo-thâu-khok-á。
04.白頭翁→白頭鵠仔pe̍h-thâu-khok-á。
05.老鷹→鴟鴞bā-hio̍h/ba̍h-hiō/lāi-hio̍rh/lāi-hiō/lā-hio̍h。
例：鴟鴞飛懸懸，囡仔中狀元；鴟鴞飛低低，囡仔快做爸。
06.八哥→鵁鴒ka-līng。
例：一寡無知ê人，亂放生外國鵁鴒，外國鵁鴒較歹死，害咱台灣本土鵁鴒強欲活欲落去矣！
07.喜鵲→客鳥。
例：喜鵲，台灣話叫做客鳥，聽講是清朝時代，一位大官對福建掠來台灣飼ê，袂輸來台灣做人客，煞踮佇台灣毋轉去。
08.企鵝→徛鵝。
例：徛鵝行路真古錐，身軀搖咧搖咧親像阿不倒。
09.灰面鵟鷹、灰面鷲→南路鷹、山後鳥。
例：彰化人講：「南路鷹，來一萬，死九千。」
10.鴕鳥→鴕鳥tô-tsiáu。
例：菜市仔有咧賣鴕鳥肉。
11.麻雀→粟鳥仔tshik-tsiáu-á、厝角鳥仔。
例：粟鳥仔會偷食粟仔，閣定定佇厝角做岫。
12.大捲尾烏→烏鶖。
例：一隻烏鶖徛佇牛ê尻脊骿(kha-tsiah-phiann)。
13.彈塗魚→花鮡(hue-thiâu)、花鮡仔。
例：花鮡仔會樹仔，實在誠希罕。
14.台灣藍鵲→長尾山娘、長尾山娘仔、長尾陣。
例：長尾山娘是山裡ê新娘，毋過真厚話，夭壽吵。
15.帝雉、黑長尾雉→烏雉雞(oo-thī-ke/-kue)。
例：一千箍ê新台幣面頂有一對烏雉雞。
16.白腹秧雞→苦雞母仔。
例：苦雞母仔ê叫聲真悲傷，袂輸是鳥仔ê苦旦。
17.壁虎→蟮蟲仔(siān-thâng-á　又唸作siān-âng-á)。
例：蟮蟲仔上gâu斷尾溜求生存。
18.蜥蜴→杜定(tōo-tīng)、四跤杜定。
例：囡仔去予杜定驚著(tio̍h)。
19.長頸鹿→麒麟鹿、長頷(ām)鹿、長頭鹿仔。
例：動物園有長頷鹿，囡仔便若看著伊就笑咍咍。
20.鯨魚→海翁、鯤鯓。
例：海翁就是大尾魚，古早大尾魚嘛叫做鯤鯓。
6.【植物花草類】華語詞→台語詞
01.木棉→斑芝、斑芝棉、斑芝樹。
例：斑芝佇二、三月仔開花，敢若一片著火ê花海。
02.千日紅、百日紅→圓仔花。
例：俗語講，圓仔花毋知䆀(bái)，大紅花䆀毋知。
03.曇花→瓊花(khîng-hue)。
例：瓊花佇夜半開花隨謝去，可比青春像露水，人生若春夢。
04.苦苓、苦楝子→苦楝仔(khóo-līng-á)。
例：苦楝仔若開花，茄仔色ê花蕊真迷人。
05.欒樹→苦楝舅仔(khóo-līng-kū-á)。四色樹(sì-sik-tshiū)。
例：苦楝舅仔嘛叫做四色樹，秋天開花，花蕊會變換四種色水。
06.油桐花→油桐花(iû-tâng-hue)又唸作(iû-tông-hue)。
例：白色ê油桐花，親像五月雪，落落塗跤有影媠。
07.木麻黃→麻黃(muâ-hông)、木麻黃(bo̍k-muâ-hông)。
例：海墘仔有種一片麻黃，聽講擋風飛沙上有效。
08.桑樹→娘仔樹。
例：細漢ê時蹛庄跤，四界都有娘仔樹。
09.楓樹→楓仔樹(png-á-tshiū)。
例：楓仔樹(png-á-tshiū)的樹葉仔是單葉、互生ê，真好認。
10.檜木(扁柏)→松梧(siông-ngôo)。
例：松梧就是日本人講ê「hinoki」，是一種高級ê建材。
11.蓓蕾→花莓(hue-m̂)。
例：少女親像花莓未開時，等待露水佮春光。
12.枇杷→枇杷(pî-pê/gî-pê)。
例：阿爸種ê彼欉枇杷，有我囡仔時快樂ê記持。
13.草莓→草莓(tsháu-m̂)。
例：草莓若欲媠媠好食款，農藥就愛照起工濺予齊。
14.茅草→茅仔草(hm̂-á-tsháu)
例：較早欲起厝、搭厝頂，攏愛去山頂割茅仔草。
15.梧桐→梧桐ngôo-tông。
例：梧桐佮莿桐ê材質攏冇冇，所以袂當做建材。
16. 台灣百合→銀鈃仔花gîn-giang-á-hue、司公鈃、鼓吹花、山蒜頭。
例：台灣百合ê土名真濟，一般叫做銀鈃仔花，嘛叫做司公鈃，閣有人叫伊鼓吹花，攏是對伊ê外形來號名ê。
註：鈃仔，giang-á，華語，『鈴鐺』。
註：司公鈃sai-kong-giang，就是三清鈴，道士作法時ê重要法器。
註：鼓吹花，華語叫著『喇叭花』。
17.牽牛花→碗花、碗公花、番仔藤、番薯舅、喇叭花、牽牛花。
例：細漢ê時，佇庄跤ê路邊，定定會看著碗公花開甲誠媠。
18.向日葵、太陽花→日頭花、太陽花。
例：2014年3月18，台灣發生一場學生追求民主佮正義ê運動，叫做「日頭花運動」。
7.【建築名稱類】華語詞→台語詞
01.住家→徛(khiā)家。
例：借問一下，咱徛家佇佗位(tó-uī)？
02.騎樓→亭仔跤。
例：有亭仔跤，就會當遮日頭、覕(bih)風雨。
03.屋簷下→砛簷gîm-tsînn、簾簷nî-tsînn　(指舊式房屋屋簷下的台
階處。) 例：伊徛佇簾簷跤覕雨，險袂赴去上班。
04.陽台→露(lōo)台。
例：露(lōo)台會當曝衫、種花草，開講閣兼話仙。
05.門檻→戶橂(hōo-tīng)。
例：囡仔人毋通坐戶橂。
06.天花板→天篷(thian-pông)。
例：自彼(hit)改地動了後，阮兜的天篷就必去矣。
8.【交通工具類】華語詞→台語詞
01.腳踏車→孔明車、鐵馬、自轉車、跤踏車。
02.汽車、轎車→自動車、轎車。
03.高級轎車、包租汽車→hai51 ia11。
04.公共汽車→巴士(ba55 suh3)、公車。
05.捷運→捷運(tsia̍t-ūn)。
06.飛機→飛行(lîng)機。

活動

• 4/26前 全站滿$1,688折$150
• 4/26前 全站滿$2,688折$260
• 4/26前 全站滿$5,888折$600