香港製造: 我和我的南亞裔朋友 | 誠品線上

香港製造: 我和我的南亞裔朋友

內容簡介

內容簡介 香港金閱獎—最佳社會政經書籍！Joe Junior、Maria Cordero (肥媽)、沈旭暉博士 聯合推薦！喬寶寶，百分百土生土長香港人，同大家一樣行廟街、篤魚蛋、食腸粉、睇李小龍、周星馳大。香港人不一定是華裔，為何黑人、白人、南亞人不可以是香港人？喬寶寶的故事亦是很多南亞裔的故事、香港人的故事，大家可能不同種族，但都是香港人。

作者介紹

作者介紹 ■作者簡介喬寶寶／口述原名喬．慕軒達保羅．星（Gill Mohinderpaul Singh），簡稱喬保羅，印度裔香港人，在香港出世，自幼在廟街一帶成長。曾於香港懲教署任職二級懲教助理十六年之久，2005年參加TVB綜藝節目《殘酷一叮》後加入娛樂圈，曾演出多齣電影及電視劇集，包括電影：《寶貝計劃》、《月滿軒尼詩》、《赤道》；電視劇《高朋滿座》、《真相》、《衝呀！瘦薪兵團》等等。2012年由於太太申請特區護照被拒，無法定期到蘇格蘭照顧患病的幼子，喬寶寶只好暫別娛樂圈，舉家移民蘇格蘭。2013年，喬寶寶坐完移民監，立即回歸香港，復出娛樂圈。

產品目錄

產品目錄 序 Joe Junior序 Maria Cordero（肥媽）序 沈旭暉博士自序第一章：故鄉我阿爺係印度農夫我老豆嚟自上海第二章：我喺廟街大廟街買校服，九公捉伊人打交趕出校，只為周星馳裕華買筷子，學食魚蛋麵喬寶寶 X 阿星（Singh Taranvir）：做個快樂七星仔第三章：做到隻積咁嘅樣麥記洗廁所，垃圾房食包家鄉雞搣籮柚，必勝客托汽水走甩船民，打機斷正監獄風雲，烏龍百出林過雲嘅眼神，葉繼歡嘅問候司法界最黑暗一日16個年頭，11個環頭喬寶寶X Jeff（Jeffery Andrews）：重慶大廈的故事第四章：我墮入情網，你卻在……我為港女著迷三張相，揀個印度娃娃盲婚啞嫁印度之旅第五章：全城盡興，殘酷一叮試叮老翻王第七集：甩晒拍子，全靠舞姿第八集：大蝦細，畀屎餵終極比拚：印度娃娃叮皇爭霸戰：無冕叮皇叮皇巧遇特首喬寶寶X 阿V（Vivek Mahbubani）之一：棟篤笑，笑自己第六章：娛樂圈趣聞辭職拍電影，叮皇冇情講深水埗托布托入電視城喬嫂嫂粉墨登場拍三級片得罪鄉里多謝圈中三位恩師第七章：為下一代放棄香港生老病死四部曲歷史真係重演眉頭今天不再猛皺2020告別香港棟篤笑喬寶寶 X 畢艾美（Butt Asma Ali）：我愛香港，香港愛我嗎？第八章：同熱愛這片土地我唔係阿差我愛廟街貨我愛廣東話我係香港人喬寶寶X 阿V（Vivek Mahbubani）之二：煩惱即笑話

商品規格

試閱文字

內文 : 廟街買校服，九公捉伊人

我由細到大都住佐敦，南京街、廟街一帶我熟晒。起初我間屋係租嘅，到八十年代有大集團收購咗我哋棟樓，叫我哋買咗佢，我哋屋企人比較多，阿爸阿媽加五兄弟姊妹，老豆覺得我哋住返喺度會舒服啲，就買咗間屋分十年供，自己做多幾份工搵錢，阿媽同我哋五兄弟姊妹就一齊喺屋企黐膠花，雖然辛苦，但係生活得好開心。大家姐最早出嚟做嘢，大佬中五後都出嚟做嘢幫補家計，我就中三開始做兼職。
廟街乜都有，好多最新嘅衫褲鞋襪，連買件校服都有型啲，校服褲有兩個褶或三個褶。有一次我去買校服褲就同個老闆講，一陣我會同阿媽一齊嚟買，我阿媽實會講價，條褲原價65蚊，你同佢講100蚊，最後收返佢65蚊就得啦，你又唔使蝕本，我又買到條褲。結果我同阿媽去到，阿媽去到果然叫人「平啲、平啲」，我同老闆打個眼色，原價成交，奸計得逞。
由佐敦跑去尖沙咀好近，我同一班小學中學同學仔就成日跑去九龍公園踢波，嗰陣九龍公園有兩個足球場，我同班鄉里去跟隊，初頭我係打前鋒嘅，後來開始唔夠氣就轉去守龍，隊友見我打得幾好，好過打前鋒咁獨食，我就一直守龍，嗰陣都算係鋼龍。近年工作忙，韌帶又受咗傷，就好少踢波啦。除咗踢波我都有打曲棍球，仲係懲教嘅代表隊，成績都唔錯，算係甲組尾乙組頭，通常一年打乙組打到冠軍，升班到甲組第二年又降班。九龍公園其他角落我都玩勻晒，平日阿爸阿媽會帶住成家人去散步、睇風景。我同一班朋友都會喺九龍公園周圍玩，跑來跑去，玩何濟公、伏匿匿、捉伊人。
重慶大廈係另一個我哋成日去嘅地方，喺重慶食咖哩比出面抵啲又地道啲，不過其實我哋唔係成日出街食飯，始終一家七口喺屋企買餸煮飯平好多，你哋可以留意下，喺出面嘅餐廳酒樓好少會見到我哋啲鄉里。阿媽係家庭主婦，多數都係煮印度菜，不過其實我鍾意食Chinese food多啲，阿媽間中會煮公仔麵，加啲白菜、芥蘭、雜豆、魚蛋，或者炒飯炒麵，我哋唔食蝦、牛，但可以食豬肉，或者買啲叉燒，我都一定清晒，覺得好正，反而煮印度菜會食剩。去重慶另一個目的就係租錄影帶睇，嗰陣仲係VHS年代，但我哋屋企冇錄影機，就會去重慶租啲印度片去人哋屋企睇，印度電影業都幾發達，每日都有一至三套電影，香港嘅電視台當年星期日下晝都會播印度片，我哋拜完神返屋企就會睇。我其實更鍾意睇香港電影，鍾意睇李小龍、成龍、許冠傑、周星馳，但屋企人鍾意睇印度片，我一個人邊夠佢哋爭？想睇香港電視劇更加唔使旨意，屋企電視好難爭，老豆返屋企會睇英文新聞台，睇完就到老媽子大佬家姐睇印度片。
老豆一個月都會帶我.一家人出去玩一次，荔園、海洋公園都去過好幾次，掟銀仔、過山車、水族館、100米高空跳水、殺人鯨等等都係我細個好開心嘅回憶。當年沙田仲係好偏僻嘅地方，老豆有時會帶我哋去沙田食中國嘢，價錢比市區平好多，燒賣、腸粉、炒飯、炒麵我都好鍾意食。