阿烏會學游 A-oo Ē O̍h Iû: 台語故事有聲音韻詩 | 誠品線上

阿烏會學游 A-oo Ē O̍h Iû: 台語故事有聲音韻詩

內容簡介

內容簡介 音韻是走揣台語寶的鎖匙， 臺羅、漢字是傳承台語的開始。 音掠予準，聽說台語自信閣歡喜， 字莫花去，讀寫台文媠氣閣趣味。 這本冊大碗閣滿墘，是你學臺羅、學音字， 自學、教學、競賽、認證，練聽講讀寫的武器， 是逐家親近台語上讚、上貼心的má-tsih. 本土語言傑出貢獻獎得主、專業級台語博士王秀容，用伊自學、講座台語的經驗，佮伊對語言、文化、文學幼膩的思考佮筆力，寫25篇是詩、是歌、是唸謠的生活故事，用聽音、辨音、記音、發音的學習原理，欲予讀者共台語音韻練予較滑溜、較精確。 延續《我咧唱歌》、《咱來讀讀》兩本散文集女性書寫的生花妙筆佮有聲內容，王秀容以專業的配音經驗佮有公信的發音示範，陪伴讀者學習臺羅，了解音韻原理，建立發音一理通萬理徹的自信。 全冊音韻詩、應答短文攏有媠聲朗讀，QR Code 隨掃隨聽。閣有古錐的音字袂花去三語圖典，為咱台語拍底蒂。嘛有俗諺三語快譯通，欲予外國人嘛看有台語的智慧。逐篇都有台語漢字、臺羅克漏字學習單，自學教學攏鑠奅。 緊來共這本冊掀開，用生活故事快樂學聲韻，伨你台語聽講讀寫順順順，用哲學思考趣味講心境，予咱感恩寧靜渡風湧，自由自在過人生。 【心適推薦】 王崇憲（高雄五福國中台語老師，台文作家、譯者） 呂美親（國立臺灣師範大學臺灣語文學系副教授、台文作家） 洪淑昭（高雄市光華國中台語老師，台文作家、譯者） 黃震南（文史工作者） 鄭順聰（台文作家） 【本冊特色】 ① 25篇生活故事台語音韻詩，朗讀唸歌自然學習台語韻母 ② 音韻詩附教育部頒訂漢字、臺羅對照 ③ 音韻詩、應答短文有聲QR Code隨掃隨聽 ④ 簡單註解、華台英俗諺對照、相近音字練習、問答題目，看圖情境造句對話真好用 ⑤ 音韻詩附漢字、臺羅克漏字，配合音檔聽寫練習進步緊 ◎本書榮獲文化部「語言友善環境及創作應用補助」

作者介紹

作者介紹 作者簡介｜王秀容高雄人。臺灣師範大學台文學系博士、靜宜大學英語系碩士、成功大學外文系學士。臺灣師範大學台文系、黎明技術學院兼任助理教授。公視台語台節目顧問、教育部臺灣台語常用詞辭典錄音、台語配音員、教育部學科術語編輯錄音、公視台語台新詞辭庫編審、國小國中高中台語教科冊編輯主編。臺大、臺師大國際教材校審配音。臺北市國中台語教師。新北市國中英語台語教師退休。重要經歷：100年教育部推展本土語言傑出貢獻獎；104年教育部閩南語語言能力認證專業級；102-109年教育部閱讀閱懂閩客語專欄、朗讀稿作者；教育部佮新北市文學獎；全國語文競賽閩南語字音字形第一名、演說第四、第五名、朗讀優等；教育部優秀本土語言指導員；新北市優秀輔導團員；全國佮縣市語文競賽佮教學命題、評審、指導、講師；公視台語台「咱的歌台語囡仔歌」作詞演唱評審顧問；國際翻譯社翻譯師；政大師大國際學生授課；台語有聲教材佮影音作者、編輯、錄音、審聽、指導；新北市閩南語字音字形工作坊成果主編。四界攏有伊的聲，人叫伊台語Google小姐，伊講家己是台語永遠的學生、虔誠的信徒、傳播台語媠佮趣味的蝴蝶公主。伊上愛講「若欲媠食果子，若欲巧講台語」。2020年出版《我咧唱歌》、2023年出版《咱來讀讀》台語有聲散文集。繪者簡介｜林芸瑄臺北人，臺北藝術大學美術學系畢業，在學期間是版畫組，進行個人創作、展覽的平面設計佮刊物編輯。畢業了後，注心佇插畫創作、平面設計，作品繼續累積中。專長佇運用簡單的線條勾畫，閣用物件重組堆疊，拼貼出日常中的奇幻時空。

產品目錄

產品目錄 自序 阿烏會學游 自在閣自由1. a阿媽蹛佇花蓮的庄跤 A-má Tuà tī Hua-liân ê Tsng-kha2. oo阿烏去散步 A-oo Khì Sàn-pōo3. e阿姊學手藝 A-tsé O̍h Tshiú-gē4. o阿婆飼鵝 A-pô Tshī Gô5. i阿義踅夜市 A-gī Se̍h Iā-tshī6. u阿舅捾豆油 A-kū Kuānn Tāu-iû7. ai阿海愛賣菜 A-hái Ài Bē Tshài8. au阿孝𠢕飼狗 A-hàu Gâu Tshī Káu9. iau鳥鼠佮貓 Niáu-tshí Kah Niau10. io搖啊搖過吊橋 Iô ah Iô Kuè Tiàu-kiô11. im阿欽彈琴 A-khim Tuânn Khîm12. in郭敏有品無過敏 Kueh Bín Ū-phín Bô Kuè-bín13. ing阿清阿靜上興冰豆奶 A-tshing A-tsīng Siōng Hìng Ping Tāu-ling14. m敢是阿姆？ Kám-sī A-ḿ?15. ng阿黃佮阿阮 A-n̂g kah A-ńg16. ann onn enn inn unn紅豆餡 Âng-tāu-ānn17. am iam金含和鹽 Kim-kâm Hām Iâm18. an ian阿安阿燕感動天 A-an A-iàn Kám-tōng Thian19. ang iang外行翁掠蜂假煬 Guā-hâng Ang Lia̍h Phang Ké-iāng20. ap at ak ah鐵盒漆漆四角有合 Thih-a̍p Tshat Tshat Sì-kak Ū Ha̍h21. ip it ik ih著急必定玉變鐵 Tio̍h-kip Pit-tīng Gi̍k Piàn Thih22. ooh oh喔！請同學！ Ooh! Tshiánn Tông-o̍h!23. om ong onn op ok草仔茂茂茂 Tsháu-á Ōm-ōm-ōm24. un uan uann uang阿恩阿遠換心意袂閣嚾 A-un A-uán Uānn Sim-ì Bē Koh Uang25. ia mia nia ngia iann阿娘迎媽祖 A-niâ Ngiâ Má-tsóo

商品規格

試閱文字

自序 : 這本冊是文學冊。我的思考攏是對台語文學出發，才想看欲按怎予讀者自學、教學、認證、競賽。自在使用，自由選擇。
　　音字是台語的鎖匙，特別是台羅拼音系統若有夠熟，就會當享受台語的媠佮趣味。毋過有當時仔，若像會曉講，煞無夠精確呢！所以我才會想欲出這本音韻詩，陪伴有緣的人共台語音舞予清楚。
　　冊名叫做《阿烏會學游》正是咱台語的六个主韻母「a-oo-e-o-i-u」。照發音的響度大細的順序，我有編一个故事，嘛是標調號位置的口訣，「a 上大，阿烏會學游，烏糖囥頭前，游對後壁去」。故事咧講「阿烏皮膚烏烏，是一个古錐囡仔，去學游泳。獎品是烏糖，囥佇頭前，啊伊哪會游去後壁咧？」逐擺等我共短短的故事講了，學員就已經共台羅標調號的原則記起來矣，閣袂拂毋著去。有故事的學習，好耍閣好記。
　　這本故事音韻詩攏總有25 篇，照台羅音韻系統的順序，仝韻字鬥句，寫我家己感覺趣味的故事。第1 到第6 篇是單韻母a、oo、e、o、i、u；第7、第8 篇是雙韻母ai、au 來共音發予滿，莫貧惰；第9 篇iau 說明拼音原理愛對後壁去掠頭前；第10 篇是欲予北部腔講凡講，若欲寫o 袂當予oo騙去；第11、12、13 篇是三个鼻音m、n、ng，欲予逐家體會佮判斷『合起來、上、下』、『合起來、小、大』的四組發音位置的系統佮規律，嘛欲予入聲韻做準備；第14、15 篇是提醒鼻音內底的m、ng 會當做韻母；第16 篇是咱台語足特別的鼻化韻ann、onn、enn、inn、unn；第17、18、19 篇是練習共介音i 發予清楚；第20、21 篇是入聲p、t、k、h；第22 篇是入聲韻h 有分ooh 佮oh；第23 篇是欲予讀者慣勢省略一粒『o』的複合音；第24、25 篇是學台羅拼音的時，誠濟人發袂穩的音，欲予你的舌佮鼻仔通較伶俐咧。共這25
首詩好好仔聽音檔練習，發音的位置佮氣流的行徙掠予清楚，發音會較精確，閣較有自信。
　　這25 篇故事是詩，是歌，嘛是唸謠。閣攏有鬥句，欲予讀者讀起來若咧唱歌順順順。語文的學習愛要意精確，出這本冊的本意是欲幫助逐家聽音、辨音、記音、發音，一理通萬理徹。逐个音會當閣較自然，閣較滑溜咧，毋是凊彩發、用準的。這本冊嘛是故事冊，一个音有一个主角，故事內底攏有藏女性的形影，攏會當融入「十二年國民教育素養教學課程綱要」的十九項議題。每一篇攏有我錄的音檔，逐篇掃QR Code 我就唸予你聽。
　　我創作的時，心內想的攏是台語、文學、教學、認證佮競賽，我驚詩的漢字無夠、傷短，所以有「全台羅」對照，欲予逐家體會音韻的趣味、音字的對應，嘛欲予逐家練拼音、拼寫佮連結符按怎用。逐篇有十个「語詞註解」，會使耍音字聽寫、練習造句佮口語表達；有「華台英袂花去」的字圖典、「華台英三語俗諺快譯通」，會當予你多元語言學習；有「問題討論」，通予你語文競賽抑是認證考試做練習；有對應第一條提問的「應答短文」，用散文書寫秀容觀察的時事、故事佮心事，就是共恁當做朋友咧開講的意思。閣有懸層次的挑戰，記漢字上好用的「漢字克漏字」，嘛有大挑戰的「台羅克漏字」。共音檔的速度調予好勢，家己練習抑是提來教學佮評量，攏通百面用。開店毋驚人大食，主編講：「傷濟矣啦！」我講：「詩的本文」共排予古錐，賰的攏通掃 QR　Code 在人掃、在人佮意。
　　感謝阮查某囝林芸瑄小姐，國立臺北藝術大學美術系畢業的青春藝術家替這本冊畫插圖。每一首詩設計四幅圖，共故事連結起來，所以會使用來練情境演說佮看圖講話。逐篇「音字袂花去」的語詞，會用小圖予恁看圖分辨音字。台語媠閣趣味，予台語冊有音、有字、有圖、有藝術味，看著冊就歡喜，逐工都想欲講台語。
　　感謝文化部予我補助，我才有機會出第三本冊為台語文拍拚。感謝前衛出版社林文欽社長的支持、鄭清鴻主編的專業編輯，足濟文本、資料佮音檔連結幼路的工課，有主編佇咧就無問題。感謝恩師李勤岸教授做這本冊的顧問，予我閣較有信心，伊是我寫作的燈塔。感謝守／酒台語社的先輩佮沙龍晤的兄姊，有幾篇我捌唸予𪜶聽過，多謝𪜶予我寶貴的建議。感謝頂真的國賽音字金牌得主顧怡君老師陪我校稿。感謝故事內底的親情五十佮好朋友，恁予我生活豐富有故事。逐篇故事攏有後壁的故事。感謝親愛的阿母、伨我的兄姊、老實的翁婿佮兩个貼心的寶貝查某囝。「阿烏會學游」的原型是阮翁肉烏烏，伊煬講太平洋是伊的游泳池，阮查某囝彼陣嘛拄好咧學泅水。人生就是按呢，每一項記持攏有可能成做文學書寫的趣味。咱做伙來熟手音字，聽出語意，講出幼膩，讀出文味，寫出心意，做伙傳承台語文的媠佮趣味！

試閱文字

內文 : 1. a｜阿媽蹛佇花蓮的庄跤
A-má Tuà tī Hua-liân ê Tsng-kha


阿媽蹛佇花蓮的庄跤
後壁埕有飼六隻烏鴨
頭前埕有種三欉芋仔
閣有大欉樹仔好蔭影
樹頂飛來十隻烏鴉
對天光透早到日頭落山
不時都咧　啊　啊　啊

A-má tuà tī Hua-liân ê tsng-kha,
Āu-piah-tiânn ū tshī la̍k-tsiah oo-ah,
Thâu-tsîng-tiânn ū tsìng sann-tsâng ōo-á,
Koh ū tuā-tsâng tshiū-á hó ǹg-iánn.
Tshiū-tíng pue lâi tsa̍p-tsiah oo-a,
Uì thinn-kng thàu-tsá kàu ji̍t-thâu lo̍h-suann,
Put-sî to teh ah ah ah.


烏鴉誠實有夠吵
吵甲阿媽氣掣掣
攑來鳥擗欲共嚇
相準烏鴉欲共彈

Oo-a tsiânn-si̍t ū-kàu tshá,
Tshá kah a-má khì-tshuah-tshuah.
Gia̍h lâi tsiáu-phia̍k beh kā hánn,
Siòng tsún oo-a beh kā tuānn.


彼時烏鴨行倚伊的跤
阿媽毋但拍著驚
家己的跤煞踏著烏鴨的跤
踏甲烏鴨連紲叫六聲
樹頂的烏鴉嘛著驚　隨喝　啊　啊　啊
逐隻飛甲無看見影

Hit-sî, oo-ah kiânn uá i ê kha,
A-má m̄-nā phah-tio̍h-kiann,
Ka-tī ê kha suah ta̍h-tio̍h oo-ah ê kha,
Ta̍h kah oo-ah liân-suà kiò la̍k siann.
Tshiū-tíng ê oo-a mā tio̍h-kiann, suî huah ah ah ah.
Ta̍k-tsiah pue kah bô khuàinn iánn.


呱　呱　呱　呱　呱　呱
趕趕趕　趕趕趕
阿媽趕鴨去後壁埕
紲落　踏入灶跤　喝欲啉茶止喙焦

Kuā kuā kuā, kuā kuā kuā,
Kuánn kuánn kuánn, kuánn kuánn kuánn,
A-má kuánn ah khì āu-piah-tiânn,
Suà--lo̍h, ta̍h ji̍p tsàu-kha, huah beh lim tê tsí tshuì-ta.


阿媽茶啉煞　目睭一下看
哎喲喂啊
六隻烏鴨無人看
哪會閣走來頭前埕
才一觸久仔
慘矣　烏鴨共三欉芋仔食甲焦焦焦

A-má tê lim suah, ba̍k-tsiu tsi̍t-ē khuànn,
Ai--iō-uê--ah,
La̍k-tsiah oo-ah bô lâng khuànn,
Ná ē koh tsáu lâi thâu-tsîng-tiânn?
Tsiah tsi̍t-tak-kú-á,
Tshám--ah, oo-ah kā sann-tsâng ōo-á tsia̍h kah ta-ta-ta.


這聲
阿媽是欲按怎較好啊？

Tsit-siann,
A-má sī beh án-tsuánn khah hó--ah?

【華台英俗諺快譯通】
台：豬頭毋顧，顧鴨母卵。
Ti-thâu m̄ kòo, kòo ah-bó -nn̄g.
華：本末倒置。
英：Don’t put the cart before the horse.

【問題討論】
1. 你喙焦的時較愛啉啥物？為啥物？
2. 你較佮意蹛都市抑是庄跤？為啥物？
3. 你敢有心愛的物件予人舞歹去的經驗？請講出情形佮想法。

【應答短文】

我喙焦的時較愛啉滾水、茶米茶抑是果汁，其中我上愛啉滾水。
有人講滾水白汫無味，毋過我感覺上單純、上讚。水四界攏有，閣俗，揹仔內底若紮一支茶鈷，喙焦就通揣飲水機入水啉。閣因為我教冊佮興趣的工課定定愛用著嚨喉，拉圇仔燒的滾水，半燒冷仔半燒冷上拄好。因為有滾水潤喉，到今我的聲音閣保持甲袂䆀。
我嘛會啉茶米茶，伊無啥方便閣淡薄仔貴，上興毋過無逐工啉。我佮意彼款苦甘仔苦甘、順喉的滋味。啉著高山茶米，人隨飛去懸山1500 米，規个人會予大自然的美景箍入去。
我嘛誠愛啉果汁，因為我是果子國的。食飯飽，規盤的果子照常共推落去，才會感覺五臟六腑有平衡。有當時仔無閒規工，無食著果子閣會數念呢！所以我定定點果汁來啉。毋過聽健康專家講果汁攏糖較濟，嘛警告講我這款定定拍電腦、坐鬱過久的，愛撙節好勢。酸微仔酸微的果汁會礙胃溢剌酸，我驚無踏擋仔，會變成惱氣的火燒心，只好改改咧較規氣。
所以，遮改遐改，改甲賰滾水佮茶米茶啦！單純的滾水，啉久嘛甘甜。自然、方便上歡喜。啊若欲體會人生的苦甘仔甜，當然嘛是啉茶米。看心情佮環境啦！我兩項攏佮意。

最佳賣點

最佳賣點 : 音韻是走揣台語寶的鎖匙，
臺羅、漢字是傳承台語的開始。
音掠予準，聽說台語自信閣歡喜，
字莫花去，讀寫台文媠氣閣趣味。

活動

• 8/24前 全站滿$1,600享92折
• 8/24前 全站滿$3,000享9折